Waziri Mkuu Mhe.Majaliwa azitaka Halmashauri zote nchini kutunga Sheria rafiki kwa Wachimbaji wadogo wa Madini

Posted on: May 9th, 2023

Waziri Mkuu wa Jamhuri ya Muungano wa Tanzania, Mhe.Kassim Majaliwa Majaliwa (Mb)  amezitaka Halmashauri  zote kutunga sheria ambazo zitakua ni rafiki kwa wachimbaji  wadogo wa madini kwa kuhakikisha wanashirikiana  na wadau katika mapendekezo ya utungaji wa sheria ndogo ndogo.

Mhe. Majiliwa ameyasema hayo leo Mei 9, 2023   alipowasili Jijini Mwanza kwa ajili ya ufunguzi wa  Kongamano la Wachimbaji Wadogo wa Madini na Mkutano Mkuu wa Shirikisho la vyama vya wachimbaji wadogo wa Madini (FEMATA)  ambalo limefanyika  katika ukumbi wa Rock City Mall.

" Nawaelekeza Mameya wa Halmashauri nyie ndio mnaotunga sheria ndogo muwe mnahakikisha mnawashirikisha  wadau katika mapendekezo ya utungaji wa sheria ndogo ili msiwe mnatunga sheria ambazo zitakuwa zinawaumiza watumiaji wa sheria hizo," Amesema Mhe. Majaliwa

" Sekta ya madini imekuwa ikitoa mchango mkubwa katika ukuaji wa uchumi na kongamano hili lina fursa kubwa kwetu katika kuzitoa changamoto zetu ili kuongeza tija katika kukuza uchumi wa Taifa kupitia sekta ya madini," Ameongeza Mtendaji Mkuu huyo wa Serikali.

Aidha Naibu Waziri wa Madini Mhe. Dkt. Steven Kiruswa akizungumza kwa niaba ya  Waziri wa Madini  Mhe. Dkt Dotto Biteko  amemuahidi Mhe. Majaliwa kuwa   Wizara yake  itaendelea kupokea  na kusimamia mikakati inayotolewa na serikali.

" Mhe. Waziri Mkuu nakuahidi kuwa Wizara itaendelea kupokea na kusimamia  mikakati  inayotolewa na serikali ili kuhakikisha inaongeza kasi katika kuchangia maendeleo nchini," Amesema Mhe. Dkt. Kiruswa

Pia  Mhe. Adam Malima Mkuu wa Mkoa wa Mwaza ameiomba Wizara ya Madini na Shirikisho la vyama vya wachimbaji wadogo wa Madini (FEMATA) kuja kufanya kongamano lijalo la Mwaka 2024 mkoani humo

" Mhe. Mgeni rasmi kama kauli mbiu yetu inavyosema kwamba amani iliyopo  Tanzania itumike kuwa fursa ya kiuchumi na Tanzania kwa kitovu cha biashara ya madini Afrika tunaiomba serikali iunde chombo maalum ambacho kitashughulika na suala la amani ili kukuza uchumi," Amesema  Ndg. John Binna,Rais wa FEMATA

Waziri Mkuu Mhe. Majaliwa  amefungua kongamano hilo la  Madini na Mkutano Mkuu wa Shirikisho la vyama vya wachimbaji wadogo wa Madini (FEMATA) ikiwa ni maagizo ya Mhe. Dkt. Samia Suluhu Hassan Rais wa Jamuhuri ya Muungano wa Tanzania.