Mechi ya Kirafiki Yakonga nyoyo za mashabiki Mwanza

Posted on: November 5th, 2019

Timu ya watumishi wa Serikali  (RAS Mwanza) imeshindwa kutamba mbele ya timu ya Bakwata Mwanza baada ya kukubali kichapo cha mabao 2-1.

Timu hizo zilipimana vikali kwenye mchezo maalumu wa sherehe za Maulidi ya kuzaliwa kwa Mtume  Muhammad S.A.W uliofanyika kwenye Uwanja wa Nyamagana jijini humu.  

RAS Mwanza wakiongozwa na Mkuu wa Mkoa  Mhe.John  Mongella, waliliandama lango la Bakwata na kupoteza nafasi nyingi za awali.

Bakwata walitangulia kupata bao la kuungoza kabla ya RAS kusawazisha kwenye mchezo huo uliohudhuriwa na watumishi kwa ujumla,waumini  wa  dini ya kiislamu na wananchi wa madhehebu mbalimbali .

Ramadhan Khamis  aliifungiau Bakwata  bao dakika ya 30 baada kuwatoka walinzi wa RAS na kuachia kombora kali lililomshinda kipa Michael  Ligola na kujaa wavuni.

RAS walipata pigo kwenye  dakika ya 35 baada ya mshambuliaji  wao John Mongela kuumia na nafasi yake ikachukuliwa na Gwandise Kalekele.

Hadi mapumziko Bakwata walikuwa mbele kwa goli 1-0 ambapo kipindi cha pili RAS waliingia kwa kasi na kulisakama lango la Bakwata kusaka bao la kusawazisha.Jitihada zao zilizaa matunda  baada ya Said Mwalimubora  kusawazisha akiwazidi walinzi wa Bakwata na kuuweka mpira wavuni dakika ya 70 ya mchezo.  

Timu zote zilifanya mabadiliko, mabadiliko  yaliyoinufaisha Bakwata  kwa kuandika bao la pili  kupitia kwa Hussein Bunyonyi baada ya kuwachambua walinzi wa RAS Mwanza  kunako dakika ya 79. Licha ya RAS  kusaka  bao la kusawazisha wakiongozwa na  Katibu Tawala Christopher  Kadio, ukuta wa Bakwata ulikuwa imara na kuondosha hatari zilizoelekezwa langoni kwao na hadi mwisho wa mchezo  huo Bakwata 2-1 RAS.