Serikali kutumia Shs Bilioni 5.5 kujenga Kivuko kipya cha Rugezi-Kisorya

Posted on: October 18th, 2022

Mkuu wa Mkoa wa Mwanza Mhe.Adam  Malima leo Oktoba 18,2022 amezindua ujenzi wa kivuko  kipya cha Rugezi-Kisorya, Ukerewe kinachojengwa na Kampuni  ya Songoro Marine Transport.

Kwa mujibu wa Mtendaji Mkuu wa Wakala wa Ufundi na Umeme (TEMESA) , Mhandisi Lazaro Kilahala amesema kivuko hicho kitagharimu  Shilingi bilioni 5.5.

Kivuko hicho kikikamilika kitakuwa na uwezo wa kubeba abiria 800 na tani 170 za mizigo ikijumuisha magari madogo 22

Mhandisi Kilahala ameeleza kwamba  mkataba wa ujenzi wa kivuko hicho ulisainiwa Juni 3, 2021 na ujenzi ulianza Desemba 15, 2021 na kinatarajiwa kukamilika Aprili 15, 2023.

Kwa upande wake Mkurugenzi wa Songoro Marine Transport Major Songoro ameahidi kwamba watajitahidi kuukamilisha kabla ya wakati ili  kuwarahisishia wananchi usafiri.

"Tunaishukuru sana serikali kwa kuendelea kuthamini na kutupa miradi mbalimbali yenye manufaa kwa Taifa, tunaahidi tutaendelea kufanya kazi kwa weledi zaidi" amesema Songoro.

Naye, Mkuu wa Mkoa wa Mwanza amesema serikali  inaimani na TEMESA hivyo wafanye kazi ili kuhakikisha vivuko vyote vinavyojengwa na serikali vinakuwa na viwango vya kimataifa.

"TEMESA mtendeeni haki Rais wa Jamuhuri ya Muungano wa Tanzania Mhe.Samia Suluhu Hassan kwa kusimamia vizuri  miradi yote ya vivuko ndani ya ziwa Victoria na Tanganyika" amesema Mhe. Malima.