Katibu Mkuu SADC aipongeza Mwanza kwa maendeleo

Posted on: August 23rd, 2019

Katibu  Mkuu wa Jumuiya ya Maendeleo ya Kusini mwa Afrika (SADC) Mhe.Dkt. Stergomena Tax amewasili jijini Mwanza  kwa ziara ya siku mbili huku akishangazwa na  namna mkoa huo ulivyobadilika  kwa shughuli za maendeleo  kitendo kinachoashiria  kukua kwa uchumi wa nchi na mwananchi mmoja mmoja.

Dkt. Tax amewasili Mwanza  akitokea jijini Dar es Salaam na kupokelewa na viongozi wa ofisi ya Mkuu wa Mkoa huo na kufanya kikao kifupi kabla ya kuendelea na ziara Wilaya ya Magu ambapo alisema ameshangazwa na namna mkoa  huo ulivyobadilika kwa muda mfupi.

Alisema alipowasili katika Uwanja wa Ndege wa Mwanza, ameshuhudia maboresho makubwa yakiwamo upanuzi wa barabara ya kurukia ndege, jengo la mzigo na mnara wa kuongozea ndege na majengo mengine makubwa mitaani jambo ambalo linadhihirisha    wazi Serikali imekusudia kuimarisha uchumi wa nchi na wananchi wake.

Dkt. Tax ambaye ni mzaliwa wa Mkoa wa Mwanza, alisema kila anapobahatika kufika Mwanza anashuhudia mabadiliko makubwa ambapo aliwataka viongozi waliopewa dhamana  kuendelea na kaai hiyohiyo  ili  makusudio ya Rais Mhe. Dkt. John Magufuli yaweze kutimia  ndani ya miaka atakayotawala.

“Mwanza ni jiji kubwa na hivyo linastahili kuwa mwenyeji wa mikutano mikubwa kama SADC, binafsi nimefarijika kuona mabadiliko yanayoonekana kwa macho kuanzia uwanja wa ndege hadi huku mitaani, majengo ya kisasa ambayo awali tulikuwa tunayaona   kwingineko lakini leo tunayaona hapa,"alisema Dkt.Tax.

“Naomba viongozi  muendelee kwa kasi hiyo hiyo ya kusimamia shughuli za maendeleo ili wananchi waweze kufaidi utumishi wenu chini ya  utawala wa  Rais Dkt. Magufuli,  taifa limepata kiongozi ambaye ana uchungu na watu wake na rasilimali za nchi hivyo kila mmoja anapaswa  kuwajibika kwa nafasi yake,”alisema.

Awali, Kaimu Katibu Tawala wa Mkoa wa Mwanza, Emil Kasagara alimshukuru Dk. Tax kutembelea Mwanza  huku akimpongeza namna anavyoiwakilisha Tanzania  na kuongoza vizuri mkutano wa SADC uliofanyika hivi karibuni jijini Dar es Salaam.

“Tunashukuru kwa ujio wako mkoani kwetu na tunasema karibu sana, tunafarijika kwa nafasi yako ndani ya SADC na jinsi unavyoiwakilisha nchi katika mikutano mbalimbali, hivyo ni fahari kwetu kuona Tanzania tukipokea kijiti cha uenyekiti, bila shaka  tutafika salama ndani ya mwaka mmoja na kutimiza maazimio mliofikia,”alisema.