Mfumo wa maisha kuwa chanzo shinikizo la damu - Dkt.Rudovick

Posted on: May 15th, 2021

Zaidi ya asilimia   90   ya watu wenye umri wa miaka kati ya 30  hadi 50 wanaopatwa na ugonjwa wa shinikizo la damu chanzo chake bado hakijulikani mpaka sasa.

Aidha,  watu  wenye umri wa  chini ya miaka 30  na zaidi ya  miaka 55 chanzo cha wao kupatwa na ugonjwa huo kinajulikana na kikiondolewa tatizo linakwisha.

Takwimu hizo zilitolewa  na daktari bingwa  wa magonjwa ya figo na shinikizo la damu katika Hospitali ya Rufaa ya Kanda ya Bugando, Ladislaus Rudovick.

Alisema ugonjwa wa shinikizo la damu umegawanyika katika sehemu kuu mbili ambazo ni msingi (primary) na sekondari (secondary).

 Katika siku ya Shinikizo la Damu Duniani, hospitali ya Bugando ilitoa   huduma za upimaji afya bure kwa magonjwa yasiyoambukizwa.

Dk.Rudovick alisema  kila tatizo la kiafya linatibika ikiwa mgonjwa akiwahi kupata matibabu .

Alivitaja baadhi ya visababishi vya ugonjwa huo ni pamoja na  mishipa ya kwenye figo kuwa miembamba,  uvimbe tumboni na matatizo ya tezi yanayosababisha homoni mwilini kuongezeka pamoja na mfumo wa maisha.

Kwa mujibu wa Dkt.  Rudovick, mfumo wa maisha unaweza kuwa chanzo kikubwa hasa kwa watu wenye kipato kizuri kinachowafanya kula  ulaji usiopangiliwa pamoja na kukosa muda wa kufanya aina yoyote ya mazoezi, japo ya kutembea.

“Utakuta mtu anatoka ndani kwake na kuingia kwenye gari hadi ofisini. muda wa kazi ukiisha anaingia tena kwenye gari,  anapita sehemu za burudani, anaagiza nyama, tena ile nyekundu na kileo, hasa bia, kisha anarudi nyumbani anaoga na kulala na kesho yake hivyo hivyo,”  alisema

Alisema suluhisho la kwanza kwa mtu mwenye tatizo la shinikizo la damu ni kufanya mazoezi na kuepuka ulaji usiopangiliwa huku akitoa tahadhali wanaotumia  tiba asilia ambazo hazijafanyiwa utafiti.

Dk. Rudovick,  alisema tiba asili zisizofanyiwa uchunguzi zinasababisha  madhara mengine yanayoweza kusababisha matatizo ya kiafya ikiwemo kuharibu figo.

Katika maadhimisho hayo pia  uchunguzi wa magonjwa ya ngozi ulifanyika huku,  Dk.   Nelly Mwageni akisema kwamba magonjwa hayo nayo  huendana na umri wa mtu.