RAS Mwanza awataka Watumishi wa Umma kusimamia weledi Utekelezaji mradi wa FIKIA

Posted on: August 29th, 2023

RAS Mwanza awataka Watumishi wa Umma kusimamia weledi Utekelezaji mradi wa FIKIA

Kaimu Katibu Tawala Mkoa wa Mwanza Daniel Machunda amewataka watumishi wa umma wanaohusika katika utekelezaji wa mradi wa FIKIA PLUS kufanya kazi kwa bidii na weledi na kuhakikisha wanafikia asilimia 100 za matumizi ya fedha za mradi zilizotengwa katika bajeti.

Ametoa maagizo hayo leo wilayani Misungwi kwenye kikao kazi cha siku 2 cha tathmini na maandalizi ya mpango kazi na bajeti mpya ya Mradi wa FIKIA PLUS unafadhiliwa na Shirika la ICAP kilichofanyika kwenye Ukumbi wa Gwambina Hoteli.

Amesema, Mkoa umewahaikishia Wafadhili yaani ICAP na CDC kuwa utatoa ushirikiano katika utekelezaji wa mradi huo ili kuhakikisha unatekelezwa kwa viwango vya juu  na amewapongeza ICAP kwa kuwa na ushirikishaji katika maandalizi ya bajeti ya mradi huo.

Amebainisha kuwa kwa kipindi cha miaka 2 iliyopita ya mradi kama mkoa hatukuweza kuwa na matumizi ya fedha kwa asilimia 100 jambo ambalo siyo sawa kutokana na kuwepo kwa mahitaji makubwa katika kufikia malengo ya kupambana na kuthibiti maambukizi ya Ukimwi kwenye Jamii.

Aidha, Machunda amefafanua kuwa

mwaka wa fedha wa mradi huo unaaanza Oktoba 2023 na kuisha Septemba 2024 na kwamba kikao hicho kimefanya tathmini ya utekelezaji wa mradi kwa mwaka 2022/2023 na kuandaa mpango kazi na bajeti ya 2023/2024.

Mkoa wa Mwanza umejipanga kuendelea na mapambano dhidi ya UKIMWI na udhibiti wa maambukizi mapya ili kufikia lengo la kitaifa la kuwa na maambukizi mpya sifuri ifikapo 2030.