Wataalam wa Maabara Mwanza wakumbushwa kutoa huduma bora na kuzingatia miiko ya kazi

Posted on: April 25th, 2023

Wanachama na wadau wa Chama cha  Wanasayansi wa Maabara za Afya Tanzania (MeLSAT) Mkoa wa Mwanza  wametakiwa kushiriki kikamilifu shughuli mbali mbali za chama kama njia ya kuendelea kudumisha huduma kwa  wananchi

Wito huo umetolewa  leo Aprili 25 2023 na Katibu Tawala wa Mkoa wa Mwanza Bw. Balandya Elikana wakati akifungua Maadhimisho ya Wiki ya  Wataalam wa Maabara Mkoa wa Mwanza katika viwanja vya Furahisha Wilaya ya Ilemela.

Bw. Balandya ameongeza kuwa wadau na  wataalam wa maabara watumie maadhimisho hayo kama njia ya kuboresha huduma  katika Mkoa wa Mwanza na Tanzania kwa ujumla.

"Nitoe wito kwa wataalam wote wa Maabara Mkoa wa Mwanza kuwa wanachama hai wa Chama cha Wanasayansi wa Maabara za Afya Tanzania (MeSALT) na kushiriki katika shughuli mbali mbali za chama pia Waajiri  mtoe ruhusa kwa Wataalam wa Maabara kushiriki shughuli za chama bila kuathiri utoaji huduma kwa wananchi," Amesema Mtendaji huyo wa Mkoa

Aidha  Mganga Mkuu wa Mkoa wa Mwanza Dkt. Thomas Rutachunzibwa amesema Mkoa wa Mwanza unaendelea kuhakikisha kuwa huduma za afya zinazotolewa zinakuwa bora kwa kusimamia ubora wa huduma za maabara za Serikali na za watu binafsi.

"Mkoa wa Mwanza kupitia timu ya usimamizi wa huduma za afya  tunaendelea  kusimamia na kuhakikisha kuwa huduma zote za afya zinazotolewa zinakuwa bora kwa kusimamia ubora wa huduma za maabara za Serikali na watu binafsi," amesema Rutachunzibwa

Pia Mwenyekiti wa Chama cha Wanasayansi wa Maabara za Afya Tanzania (MeSALT)  Bertrand Msemwa amesema anaiomba serikali kuendelea kuajiri wataalam wa Maabara ili waweze kufanya kazi katika kiwango ambacho kinatakiwa na huduma ziweze kutolewa nzuri.

Naye Katibu wa Chama cha Wanasayansi wa Maabara za Afya Tanzania (MeLSAT) Mkoa wa Mwanza Bw. Yusuphu Mkama amesema  wananchi wa Mkoa wa Mwanza  wafike sehemu maadhimisho yanapofanyika ili waweze kupatiwa huduma  za vipimo bure.

"Niwaombe wananchi wa Mkoa wa Mwanza muweze kufika mahali hapa ambapo maadhimisho yanafanyika muweze kupatiwa huduma na kujua afya zenu kwakuwa huduma za vipimo ni bure,"amesisitiza Mkama

Maadhimisho hayo yamefanyika Ki- Mkoa kwa mara ya 2 ikiwa ni maadhimisho ya 12 tangu kuanzishwa ambayo yanafanyika kwa muda wa wiki moja kuanzia Aprili 24  hadi Aprili 28 2023.